Jamaican Literature.Com

Carter to Frater to Blake to Bolt
Electrified like ten million volts
For Jamaica shock out in di 4 by 1
Wid an epic mind-blowing world record run

In di 100 metres Bolt false start
Did expect fi get gold but en up wid naught
Blake tek dat as di youngest champ
While Carter falter wid a bad leg cramp

Bolt did vex but seh him never cry
An tek di 200 wid blood in him eye
So we en up wid gold in di 1 an di 2
But in di 4 by 1 what would we do?

Lee did anchor di team in di heat
But fi di final dem ask Usain fi dweet
Di record was ours but could we go faster?
And could we achieve it without Asafa?

Jamaica, USA, France an St. Kitts
Italy, Poland, di Trinis an di Brits
Everybody get set in di starting blocks
Den di gun go off an dem start di clock

Carter tek off like a bullet from a gun
With a scintillating first leg run
Hand over to Frater in di lead
Who run wey lef dem at top speed

Smooth handover, no mistake
Pass di baton to Yohan Blake
But when Yohan pass to Usain
Dat’s when things did get insane

For Darvis Patton of di USA
Run up inna Great Britain’s Harry AA
Lose him balance an kin pupa lick
En up pon di ground an drop di stick

Leaving Walter Dix empty handed
Down di track alone an stranded
Tragedy fi USA an fi Dix
But in di meantime rumpus inna lane six

For di way Usain tek off was frightening
No wonder people call him lightning
And di way him accelerate an was a move
Is like him did have something to prove

Di man was focused an intense
An gi di man dem a donkey lengths
Between him and the next man was such space
Is like dem was a run two different race

Bolt blaze di track an run through di line
An Jamaica get gold in record time
Faster dan any had run before
In 37.04

The only record in Daegu dat bruk
Only Jamaicans pose beside di clock
Ending di games pon a grand climax
Creating history pon di track

And di last anthem dat dem did play
Was di one from di island of JA
A so we dweet, chat bout, dun know, naa mean
Big up di black an gold an green